கடந்த 2017-ம் ஆண்டு நடைபெற்ற சட்டப்பேரவை நம்பிக்கை வாக்கெடுப்பின்போது அரசுக்கு எதிராக வாக்களித்த ஓ.பி.எஸ் உள்ளிட்ட 11 எம்எல்ஏக்களை தகுதி நீக்கம் செய்வது தொடர்பாக இதுவரை சபாநாயகர் நடவடிக்கை எடுக்காததால், உச்ச நீதிமன்றம் தலையிட்டு இடைக்கால உத்தரவு பிறப்பிக்க வேண்டும் என திமுக சார்பில் கோரிக்கை வைக்கப்பட்டுள்ளது.
துணை முதல்வர் ஓ. பன்னீர்செல்வம், மாஃபா பாண்டியராஜன் உள்ளிட்ட 11 எம்எல்ஏக்களையும் தகுதிநீக்கம் செய்யக்கோரி அளிக்கப்பட்ட புகார்மீது நடவடிக்கை எடுக்க சபாநாயகருக்கு உச்ச நீதிமன்றம் உத்தரவிட்டு மூன்று மாதங்களுக்கு மேலாகியும், இதுவரையிலும் தகுந்த நடவடிக்கை எடுக்கப்படவில்லை. இது சட்டத்திற்குப் புறம்பானது என அந்த மனுவில் கூறப்பட்டுள்ளது.
மணிப்பூர் எம்எல்ஏக்கள் வழக்கில் உச்ச நீதிமன்றம் வழங்கிய தீர்ப்பை அடிப்படையாகக் கொண்டு கடந்த பிப்ரவரி 14-ம் தேதி, தமிழக சட்டப்பேரவையில் அரசுக்கு எதிராக வாக்களித்த எம்எல்ஏக்களை தகுதி நீக்கம் செய்வது தொடர்பாக சபாநாயகர் முடிவெடுக்க வேண்டும் உத்தரவிடப்பட்டது. ஆனால் அரசியல் சாசனப்பிரிவு 14ன் படி சபாநாயகர் தனது கடைமையைச் செய்யவில்லை.
மேலும், தகுதி நீக்கம் செய்யப்பட வேண்டிய எம்எல்ஏக்கள் மீது எந்த நடவடிக்கையும் எடுக்கப்படாத்தால், அணிமாறிய ஐந்து எம்எல்ஏக்களை சட்டசபைக்குள் செல்ல மணிப்பூர் உயர் நீதிமன்றம் தற்போது தடை விதித்துள்ளது.
இதைக் கருத்தில் கொண்டு 11 எம்எல்ஏக்களை வழக்கிலும் உச்ச நீதிமன்றம் இடைக் கால உத்தரவைப் பிறப்பிக்க வேண்டும் என திமுக சார்பில் ஆஜரான மூத்த வழக்கறிஞர் கபில்சிபல் கோரிக்கை வைத்தார்.
அதன்பின்னர் ஒத்திவைக்கப்பட்ட வழக்கு, இன்று உச்ச நீதிமன்ற பதிவாளர் முன்னிலையில் வந்தபோது, பதில் மனு தாக்கல் செய்ய சட்டப்பேரவை செயலாளர் தரப்பில் மேலும் கால அவகாசம் கோரினர். இதனைத் தொடர்ந்து வழக்கு மேலும் நான்கு வாரத்துக்கு ஒத்திவைக்கப்பட்டுள்ளது.